ساوالی حکیم تیلیم خان

برای شنیدن این نوشته به صورت فایل صوتی به اینجاکلیک کنید.

تیلیم سیزمیشم

اوٍچ قرنيد‌ن سوْنرا تيليم¬خاندان يازماق عاشيق علسگر دئديگي کيمي, “يازماماغي يازماغيندان ياخشي‌دير”. قيناما مني، من نييه تيليمدن يازيم؟ يوْخسا بو ائلين يازانلاري اؤلوب، اوزانلار ديلي‌نين ازبري تيليم‌خان, بيزيم ادبيات تاريخلريميزده، فاکولته‌لريميزده، بيليم‌يوردلاريميزدا نه¬د‌ن بئله بير حؤرمتسيزليگه معروض قاليبدير. بيلميرم تيليم ديري اوْلسايدي بونو دا “مهري خانيم”ين گؤزوندن گؤره‌جک‌ايدي؟!
“سن مني ائله‌دين ائلدن اولوسدان”
بيلمير‌م.
آنجاق بيليرم تيليمدن يازماق منه يارامير.
تيليم، تيليم، ديليم، ديليم- ديليم اوْلموش ديليمده يازيب ياراتميش خان.
آذربايجانين دوغو سيٌنيرلاريندا ديليميزي قوْرويان آسلان!
چؤگور تئللرينه تانيش شاعير،
ماهني‌لاردا ياشايان،
دؤشدن دؤشه، دوْداغدان ـ دوْداغا، تئلد‌ن ـ تئله، سازدان سازا، سازدان سؤزه، ياشايان، بيزه چاتان توٍرکولردير تيليم.
ديوا‌نسيز امپراطور، دفترسيز شاعير، چؤگورسوز اوزان‌دير تيليم.
مرَغئي گديکلرينده مني هايلايير، گلديم، گلديم، گلديم، تيليم دده، دده‌تيليم، سن ددَم قوْرقود، سن. . .
کيمليک سيمگه‌سي، سن کيمليک زيروه‌سي,
سنه من نييه هاي وئريم؟ تيليم!
يوْخسا بو ائلين هاي وئرنلري اؤلوبدولر؟
يوْخسا بو اؤلکه‌نين ائله بئش ـ آلتي شاعيري واردير؟
يوْخسا سن بو اؤلکه‌نين شاعيري دئييلسن؟
يوْخسا شاه‌سئون قيٌزلاري سنين آديني ائشيتمه‌ييب‌لر،
يوْخسا اوْ قيٌزلار سنين سؤزـ ييٌرلارينلا ساچلاريني يئللرده اسديرمه‌ييب‌لر بايراق کيمي هالايلاردا،
بو را بير اوزان گتيرين
ييٌرسيزميشام
قاراخانسيزميشام
هالايسيزميشام
چؤگورسوٍزموشم
لئيلاناسيزميشام
تيليم‌سيزميشم
ديليم‌سيزميشم
هاي موٍسلمانلار!
توٍرکوسوزموشم!
مزلقان چاييندان يئنه آخيرمي توٍرکولر؟
تيليم کيمي گئدم اوْردا بير اوْوج توٍرکو ايچم
“مزلقان چاييندان گؤتوردوم هاوا”
لئيلانا
لئيلانا
لئـي
لا
نا
سيز
ميـ
شا
م

۱- لئيلانا: شاه¬سئون هاواسيندا بير اوْيوندور (رقص).

قایناق:آلما یولو