ساوالی عاشیق رضعلی دن ایکی شعر

چيخميشيدين غم سئيرينه

جانا حئييفين گلمه دي

قاريشدين نادانا گئچدين

سانا حئييفين گلمه دي

 

گؤيلونه سن سالدين هوس

دونيايا بئل باغلادين بس

گوهري ائيله دين شكس

كانا حئييفين گلمه دي

 

ساخلادين نامرد دميني

يئمه دين دونيا غميني

داغيتدين آري جميني

شانا حئييفين گلمه دي

 

چاغير صدق ايلن علي ني

سويله يه نه دئ بلي ني

سن اوخلادين رضعلي ني

اونا حئييفين گلمه دي

 *****

چوخ قيشقيرمه ميمه چايي

آت اولن دير باشين سنين

بايرام دان آلتمبش گئدنده

ال يانديرار باشين سنين

 

باهار اولاندا تئز اوللان

اوزون داشدان داشا وورران

چوخلاريني سن آپارران

آپارماقدير ايشين سنين

 

يوخدور سنين آتا آنان

اولارين حالينا يانان

گئجه گوندوز يوخلاماسان

اوياقليقدير ايشين سنين

 

دونيادا بير تايين يوخدور

ايچيب سندن هامي توخدور

الله بيلير ياشين چوخدور

هئچ كيم بيلمز ياشين سنين

 

چوخ ياشاران هئچ اولمه رن

سن دانيشيب بير گولمه رن

سن رضعلي ني گورمه رن

يوخدور گوزون قاشين سنين

*****

 

 

ساوالی حکیم تیلیم خان دان ببیر شعر (بایراملیق اولسون)

بير جمال ائيله ييب مني شيدايي

نه شمس و الضّحي نه مه پاره دور

هردم نظريمدن اولاندا غايب

روزگاريم زوٍلفو کيمي قاره دور

 

مثل-شب-يلدا زوٍلفلري سروين

نطقومو محو ائديب صوت-تزروين

نه مرّيخدير نه عطارد نه پروين

نه قمر دؤور ائديب نه ستاره دور

 

خييالينده جيلوه لنّم سان وئررم

ماه اوٍزوندن اوتانارام يان وئررم

بير جمال گؤرمگه دو جهان وئررم

پروانه تک جيسمه جان اجاره دور

 

گويا بير ملکدي سمادن اَندي

نه فرنگ و نه روم نه روس اَفندي

نه توٍرکمن نه گوٍرجي نه راي-هندي

نه گبر و نه ترسا نه نصاره دور

 

لکّه سي يوخ بديرلنميش ماهينين

چوخ مدّتدير راهدارييم راهينين

بير جمال اربابي خوبلار شاهينين

تيليم قاپوسوندا همه کاره دور

یئنی ایل بایرامی موتلو اولسون