شاعیرلر خانی: تیلیم خان/ فتح الله ذوقی

بو ایل "مره‌غئی‌"ـه گئده بیلمه‌دیم، دئمک توفیق اولمادی کی شیدا شاعیر و شیعی عارف حکیم تیلیم خان آدینا کئچیریلن قورولتایا قاتیلام؛ بلکه‌ده تیلیم دده بیر باشقا زامان بیزی قوناقلایاجاق‌دیر بو ایل. البته کئچن ایلده کی یولداشلارلا بیرگه گئدیردیک، یاری‌یولدا ایتطیلاعات مأمورلاری اوتانماز ـ اوتانماز اوتوبوسون قاباغینی کسیب، چیخیب آدلاریمیزی یازاندان سونرا هامیمیزی قوما قایتاردیلار! بوندان آرتیق آقای قیچلوئی‌نین سرگی قورماغا آپاردیغی کیتابلارینی ‌و منیم اؤز دفتر ـ کاغاذیمی احتوا ائدن کیفیمی ده آلیب آپاریب نئچه آی ساخلادیلار. اینانماییرسیز اینانمایین آما ائرمنی‌لرین راحاتجاسینا قاراکیلیسه‌یه ییغیلماقلاری آزاد اولان بو ایسلامی مملکتیمیزده بیزیم بیر شیعه شاعر و عارفین مزارینا گئتمه‌یه مانع اولدولار، نییه کی زیارتینه گئتدیگیمیز شاعیر، ـ البته بیز اؤزوموزده ـ "فارس" دئیل‌دیک، یازیقلار اولسون!، یوخسا سوننو سهل‌دیر کافیرده اولسایدیق ابدا قاباغیمیزی آلمازدیلار، به‌یه ایلده زرتشتی‌لر "چک‌چک"ـه ییغیشمیرلار!؟ نه ایسه (تلک شقشقة هدرت ثم قرّت!)، بیر ناقابل شعر یازمیشام کی بو قوشمانی بؤیوک تورک اوزانی آشیق گونش  جنابلاری آدینا، شاعیرلر خانی حکیم تیلیم خانین اولو آستانینا تقدیم ائدیرم!

 

شاعیرلر خانی تیلیم خان! 

تیلیم خان سنی گؤرمه‌یه

داغلاری آشیب گلمیشم

مزار داشینی اؤپمه‌یه

گؤزلریم داشیب گلمیشم

 

شیدا شاعیرلرین باشی

عرفان اوزوگونون قاشی

سنی دوستلارلا یاناشی

گؤرمه‌یه دوشوب گلمیشم

 

چوخ اوخودوم دیوانینی

یادا سالدیم دورانینی

گؤروب عشق و ایمانینی

بیر قوشما قوشوب گلمیشم

 

شاعیرلر خانی، تیلیم خان

شعرین آسلانی تیلیم خان

ایراقین جانی تیلیم خان

اوره‌ییم بیشیب گلمیشم

 

هر شاعیر بیر سئوگی‌لی‌یه

مختومقولو منگی‌لی‌یه

سنده مهری تک گولویه

منده آلیشیب گلمیشم

 

تیمور خان اوغلو تیلیم خان

سنه باش اییر تورکیستان

بوتون ایران ـ آذربایجان!

منده یاناشیب گلمیشم

 ﷼﷼﷼

 گون گلدیکجه آدلانارسان

اوره‌کلرده دادلانارسان

«مره‌غئی»! آبادلانارسان

سانما کی چاشیب گلمیشم

 قوم - 25/4/1378

قایناق: http://zovqi.blogfa.com/post-27.aspx

قاشقای تورک بیلگینی اوستاد اسدالله مردانی ایچین آغیرلاما توره نی

اولو تانری آدی ایله

 ۰۹/۰۸/۱۳۸۷ تاریخینده تهرانین بهمن فرهنگسراسیندا اوستاد اسدالله مردانی ایچین آغیرلاما توره نی قورولدو. بو توره ن اوستادین یازیب یایدیغی سوزلوگون ایلک گوستری(دوواق آچدی) بهانه سی ایله قورولموشدو. توره نه قاتیلان قوم ساوا تورکلریندن اولان آشیق گونش(علی رمضانی) حکیم تیلیم خان دان بیر شعر اوخویوب و شاهسئون هاواسین توره نه اسدیردی. آیریجا آپاریجی خانم فتانه مرادی قره قانی دا حکیمین شعرلریندن ایکی بند اوخودو:

اؤلکه­ميز «ايراق»دير شهريميز ساوا

مزلقان چاييندان گؤتوردوم هاوا

عاشيقلار دردينه ائيلرم داوا

من طبيبم هيندوستاندان گليرم

 

بيلنلر بيلسين­لر من تيليم­خانام

بيلمه­ينلر بيلسين, گؤوهرم, کانام

مرغئي ساکيني, اصلي توٍرکمانام

گزه- گزه بو  جهاندان گليرم

Ölkə­miz «İraq»dır şəhrimiz Sava

Məzləqan çayından götürdüm hava

Gəzə- gəzə bu  cəhandan gəlirəm

Mən təbibəm Hindustandan gəlirəm

 

Bilənlər bilsin­lər mən Tilim­xanam

Bilmə­yənlər bilsin, gövhərəm, kanam

Mərəğey Sakini , əsli Türkmanam

Aşiqlar dərdinə eylərəm dava

تورن دن نئچه گورونتو (گورونتولرین کیفیتیین آشاغی اولدوغونو باغیشلایاجاقسینیز):

 

 آپاریجی: خانم فتانه مرادی قره قانی و هاوا موسیقی گروهو

اسدالله امیری و اوستاد آشیق گونش(علی رمضانی)

دوکتور صدیق، اوستاد اسدالله مردانی، آقای شیبانی و توره نه قاتیلانلار