ننه گلينلري دانلايير. بو سينا گرک ايندي يولا دوشهايدي، اوشاغا گرک يول گئتمهيي اؤيرهدهسن. ايرجين شعري ياديما دوشور: دستم بگرفت و پا بپا برد / تا شيوهي راه رفتن آموخت.
ننهنين ايلي بايرامدان دئييل، تيليمخان قورولتايي ايله يئنيلهنير. هر شئي تيليمخان گونوندن قاباق و تيليمخان گونوندن سونرايا بؤلونور. بير آي قالميش ننه اسدين قوناقلاريني گؤزلهيير…
سون دؤنه ننهنين سسيني تئلفون آرخاسيندا ائشيديرم. کلاسيک بير نوسخهني تصحيح ائدرکن بو جوملهيه راستلاشيرام:
« و هر کيمسه اوْل کيمسه حضرت اَنگسهسينده نماز قيله…» انسه سؤزجويونون آذربايجانين خالق ديلينده اولدوغونو بيليرم. سليمان نوراللهي دا بو سؤزجويو بير شعرينده “انسه” فورماسيندا ايشلهديبدير، و من اونون کيتابينين سؤزلوک بؤلومونده بو کلمهني آچيقلاميشام. آمما کلمهني دقيقلشديرمک ايستهييرم. بو آرادا مهندس اميري زنگ وورور. بو کلمهني اوندان دا سوروشورام. دئيير: ننهم بورادا، قوي اوندان سوروشوم. ننهنين سسي آيدين دا اولماسا تئلفون آرخاسيندان ائشيديلير. نهايت بو کلمهيه اوخشار بير کلمه دهن سؤز اچير ننه: انگسهماق: اسنهمک و خميازه آنلاميندا، بو کلمه.
«ان دهيرلي کيتاب» باشليقلي بير يازيدا، ننهلرين روْلونو سؤزجوکلريميزي ساخلاماقدا آچيقلاميشام. بيزيم ديلي يالنيز اونلار ياخشي بيلير. آما نه يازيق! شنبه گونو آجي بير مئساژ گلير، اميري گؤندريب: آنام عؤمرونو سيزه وئردي.
حيات يولداشيم اوخولدادير. بئله بير دردي کيمله پايلاشيم آخي؟ قاييديب جاواب يازيرام: «…او تيليمخان قاييتمايينجا اؤلمهدي» شهريارين شعري ياديما دوشور: ايواز گليب چاتمايينجا ياتمارام. منيم يازيلاريمي ايزلهينلر بئله بئله جوملهلردن نه ايستهديييمي بيليرلر.
دوزگونو مرهغئييه دوغرو يولا دوشوروک، ذوقي و من. براتعلي فتح اللهي دا ساوه ده بيزه قوشولور. مرهغئي هميشه کي مرهغئي دئييل. من ده:
داش
داش ايدي،
کوْل
کوْل
آمما من
من دئييلايديم.
قورخورام تيليمخاندا ننهنين گئتمهيي ايله گئده، بيز هاميميز مرهغئي ده اونون چيراغي باشينا ييغيشارديق. دئييردي: گلن ايل گلسهنيز سينا دا يوْلا دوشر. ننه اؤلور، گلن ايل آنلامدان دوشور، مرهغئي آنلامدان دوشور، آقاي بيات! ننهم سني چوخ ايستردي، نامازدان سونرا هميشه اونا دوعا ائله، اميرينين بؤيوک باجيسي دئيير، باجي قيزيسي دايانا بيلمهييب اوجادان آغلايير. گوننل داغينين باشيني قار آليبدير، بير قارالتي گؤرونور گؤزومه، کرم اصلي آرديجا مي گئدير، يوخ تيليمخان دير. گئدير مي، گلير مي؟ هئچ شئي بللي دئييل، آنجاق ننه ايکينجي گون اولاراق تورپاق آلتيندا ياتيب.
قاييديريق، «باشيميز آخشامين يوْرغون چييينلرينده…»
بير داها دؤنه بيلهجهييک مي؟ ننه بيزي اونوداجاق ياني؟ يوخ! ننهلر بالالاريني اونوتمازلار.يئنه دؤنهجهييک. بيزيم او کندده سؤزجوک و تورپاق و ديوان واريميزدير. ديوان تورپاق ايله سؤزجوک بيرلشيميدير، ديوان تيليمخاندير. مرهغئي گديکلرينده مني سسلهيير. گلديم، گلديم، گلديم، دهدهتيليم، تيليمدده
سن ددهم قورقورد
سن…
قایناق: http://www.hbayat.azerblog.com/1387_09_17_Say=826.ay
